'ആ നാണക്കേട് എന്റെ ഒപ്പം എല്ലാക്കാലത്തും ഉണ്ടാകും, ഇനി അത് നടക്കില്ല എന്ന് ഉറപ്പാക്കാം'; ജാന്‍വി കപൂർ

പെദ്ദിയിലെ തന്റെ കഥാപാത്രത്തെ അവതരിപ്പിച്ച രീതി തികച്ചും സ്ത്രീ വിരുദ്ധവും ലൈംഗികച്ചുവയോടെയുള്ളതാണെന്നും നടി ജാന്‍വി കപൂര്‍. ഈ അപമാനം ജീവിതകാലം മുഴുവനുണ്ടാകുമെന്നും ഇനി ഒരിക്കലും അത് നടക്കില്ല എന്ന് ഉറപ്പാക്കാന്‍ മാത്രമേ തനിക്ക് കഴിയുകയുള്ളൂവെന്നും ജാന്‍വി പറഞ്ഞു. ജാന്‍വി കപൂര്‍ പറഞ്ഞ വാക്കുകളാണ് ഇപ്പോൾ സോഷ്യല്‍ മീഡിയയില്‍ ശ്രദ്ധ നേടുന്നത്. കരൺ ജോഹറിന് നൽകിയ അഭിമുഖത്തിലാണ് ജാൻവി ഇക്കാര്യം പറഞ്ഞത്.

'ആ കഥാപാത്രത്തെ കുറിച്ച് ഒരുപാട് കാര്യങ്ങള്‍ ഫീല്‍ ചെയ്തിരുന്നു. പക്ഷേ അതൊന്നും എനിക്ക് പറയാന്‍ സാധിച്ചിരുന്നില്ല. കാരണം ഒരുപാട് ആളുകള്‍ ചിത്രത്തിന് വേണ്ടി ഹാര്‍ഡ് വര്‍ക്ക് ചെയ്യുന്നുണ്ടായിരുന്നു. എന്താണ് പറയേണ്ടതെന്നോ എന്താണ് പറയാനുള്ളതെന്നോ സത്യം പറഞ്ഞാല്‍ എനിക്ക് അറിയുമായിരന്നില്ല', ജാന്‍വി പറഞ്ഞു.

'സംഭവം എന്ത് തന്നെയായാലും അതിലുള്ള എന്റെ ഉത്തരവാദിത്തം ഏറ്റെടുക്കുക എന്നത് പ്രധാനമാണ്. ആ കഥാപാത്രം നമ്മുടെ സമൂഹത്തിലെ ഞാനടങ്ങുന്ന ജെന്‍ഡറിനെ ഏത് തരത്തിലാണ് മോശമായി സ്വാധീനിക്കുക എന്ന് ഞാന്‍ മനസിലാക്കുന്നുണ്ട്. ആ അപമാനം എന്റെ ഒപ്പം എല്ലാക്കാലത്തും ഉണ്ടാകും. എനിക്ക് മറ്റൊന്നും ചെയ്യാന്‍ പറ്റില്ലായിരുന്നോ, കൂടുതല്‍ ജാഗ്രത പുലര്‍ത്താമായിരുന്നില്ലേ, വലിയ പ്രശ്‌നം ഉണ്ടാക്കാമായിരുന്നില്ലേ എന്ന ചേദ്യങ്ങള്‍ക്ക് തീര്‍ച്ചയായും അതെ എന്നാണ് ഉത്തരം. ആ കഥാപാത്രം പ്രശ്‌നമുണ്ടാക്കുമോ, അത് എക്‌സ്ട്രീം ഒബ്‌ജെക്ടിഫിക്കേഷനാണോ, അത് സ്ത്രീകള്‍ക്കെതിരെയുള്ള അതിക്രമത്തെ പ്രോത്സാഹിപ്പിക്കുമോ എന്ന ചോദിത്തിനെല്ലാം ഉത്തരം അതെ എന്നാണ്', ജാന്‍വി പറഞ്ഞു.

'ഇനി ഒരിക്കലും അത് നടക്കില്ല എന്ന് ഉറപ്പാക്കാന്‍ മാത്രമേ എനിക്ക് സാധിക്കുകയുള്ളൂ. മറ്റൊരു കാര്യം കൂടെയുണ്ട്. അത് പറയാന്‍ എനിക്ക് താത്പര്യമില്ല, കാരണം ഞാന്‍ മറ്റൊരാളുടെ മേല്‍ പഴി ചാരുന്ന പോലെയാണ് അത് കേള്‍ക്കുമ്പോള്‍ തോന്നുക. എന്താണെന്ന് വെച്ചാല്‍ പലപപ്പോഴും നമ്മള്‍ സംവിധായകന്റെ വാക്ക് കേട്ട് പ്രൊഫഷണലായി ചെയ്യാനാണ് ശ്രമിക്കുക. അതിലൂടെ പരമാവധി പ്രശ്‌നങ്ങള്‍ ഒഴിവാക്കാന്‍ ശ്രമിക്കും. സൗത്ത് ഫിലിം ഇന്‍ഡസ്ട്രികളില്‍ വളരെ റെയറായിട്ടാണ് ഒരു കംപ്ലീറ്റ് തിരക്കഥ ഉണ്ടാകുക. അതില്‍ ക്യാമറ ആങ്കിള്‍ ഏതാണെന്ന് പോലും നമുക്ക് പലപ്പോഴും മനസിലാവില്ല. വളരെ പ്രവിലേജ് ഉള്ള സ്ഥലത്ത് നിന്നുമാണ് ഞാന്‍ വരുന്നത്. പെദ്ദിയില്‍ ഞാനത് പ്രയോജനപ്പെടുത്തണമായിരുന്നു. എന്ത് തന്നെയായാലും ഇനി മറ്റൊരു നടിയെ ഇത്തരത്തില്‍ അവതരിപ്പിക്കുന്നതിന് മുമ്പ് എല്ലാവരും രണ്ടാമതൊന്ന് ആലോചിക്കും', ജാന്‍വി കൂട്ടിച്ചേർത്തു.

രാം ചരണും ജാന്‍വി കപൂറും പ്രധാനവേഷത്തിലെത്തിയ ചിത്രമായിരുന്നു പെദ്ദി. വമ്പന്‍ ബജറ്റിൽ ഒരുക്കിയ ചിത്രം തിയേറ്ററുകളില്‍ പരാജയമായി മാറുകയായിരുന്നു. ജാന്‍വി കപൂറിനെ ഒബ്‌ജെക്ടിഫൈ ചെയ്ത് പല രംഗങ്ങൾ ചിത്രീകരിച്ച രീതിയ്‌ക്കെതിരെയും വലിയ വിമര്‍ശനങ്ങളായിരുന്നു സംവിധായകനെതിരെ ഉയര്‍ന്നത്. പിന്നാലെ ബുച്ചി ബാബ സന ക്ഷമാപണം നടത്തുകയും ചെയ്തിരുന്നു.

Content Highlights: Jhanvi Kapoor talks about her character in peddi movie